ລາວ ແລະ ກຳປູເຈຍ ລົງນາມເອກະສານຮ່ວມມືລະຫວ່າງສອງປະເທດ ຈຳນວນ 7 ສະບັບ
http://livelaos.blogspot.com/2014/02/7.html
ຕອບສະໜອງຕາມຄຳເຊີນຂອງທ່ານ ທອງສິງ ທຳມະວົງ ນາຍົກລັດຖະມົນຕີແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ສົມເດັດອັກຄະມະຫາເສນາບໍດີ ເຕໂຈ ຮຸນເຊັນ ນາຍົກລັດຖະມົນຕີແຫ່ງ ຣາຊະອານາຈັກກຳປູເຈຍ ແລະ ຄະນະ ໄດ້ເດີນທາງຢ້ຽມຢາມ ສປປ ລາວ ຢ່າງເປັນທາງການ ແຕ່ວັນທີ 6-7 ກຸມພາ 2014 ການຢ້ຽມຢາມຄັ້ງນີ້ ເປັນການຢ້ຽມຢາມຄັ້ງທຳອິດ ພາຍຫຼັງໄດ້ຮັບການເລືອກຕັ້ງອີກຄັ້ງໜຶ່ງ ໃຫ້ດຳລົງຕຳແໜ່ງເປັນນາຍົກລັດຖະມົນຕີແຫ່ງ ຣາຊະອານາຈັກກຳປູເຈຍ ໃນປີທີ່ຜ່ານມາ ເຊິ່ງຈະເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ທີ່ມີມູນເຊື້ອອັນດີງາມຢູ່ແລ້ວນັ້ນ ໃຫ້ສືບຕໍ່ພັດທະນາດ້ວຍບາດກ້າວໃໝ່ຕໍ່ໄປ.
ພາຍຫຼັງເດີນທາງເຖິງນະຄອນຫຼວງວຽງຈັນ ພິທີຕ້ອນຮັບຢ່າງເປັນທາງການ ໄດ້ຈັດຂຶ້ນຢ່າງສົມກຽດ ແລະ ສະຫງ່າລາສີ ທີ່ຫ້ອງວ່າການລັດຖະບານ ນຳໂດຍທ່ານ ທອງສິງ ທຳມະວົງ ນາຍົກລັດຖະມົນຕີ ພ້ອມດ້ວຍການເຂົ້າຮ່ວມຂອງສະມາຊິກຄະນະລັດຖະບານ ສະມາຊິກສະພາແຫ່ງຊາດ ຫົວໜ້າບັນດາອົງການຈັດຕັ້ງມະຫາຊົນຂັ້ນສູນກາງ ນາຍທະຫານ ນາຍຕຳຫຼວດ ແລະ ຜູ້ຕາງໜ້າມວນຊົນຊາວນະຄອນຫຼວງວຽງຈັນ ຢ່າງຫຼວງຫຼາຍ.
ການພົບປະປຶກສາຫາລືຮ່ວມກັນຢ່າງເປັນທາງການ ໄດ້ຈັດຂຶ້ນໃນຕອນເຊົ້າຂອງວັນດຽວກັນ ທີ່ຫ້ອງວ່າການລັດຖະບານ ໂດຍສອງນາຍົກລັດຖະມົນຕີ ໄດ້ແຈ້ງສະພາບການພັດທະນາເສດຖະກິດ-ສັງຄົມ ໃຫ້ກັນຊາບ ແລະ ການຮ່ວມມືລະຫວ່າງສອງປະເທດ ໂດຍສະເພາະ ໄດ້ສະແດງຄວາມຊົມເຊີຍຕໍ່ສົມເດັດ ຮຸນເຊັນ ທີ່ໄດ້ມີນະໂຍບາຍອັນຖືກຕ້ອງໃນການນຳພາປະເທດ ແລະ ໄດ້ມີບາດກ້າວອັນໃໝ່ ແລະ ໜັກແໜ້ນໃນການພັດທະນາເສດຖະກິດ-ສັງຄົມ ທ່ານ ທອງສິງ ທຳມະວົງ ໄດ້ຊົມເຊີຍຕໍ່ຜົນສຳເລັດຂອງການເລືອກຕັ້ງ ອັນໄດ້ດຳເນີນໄປຢ່າງຖືກຕ້ອງ ແລະ ເປັນທຳ ທັງຜ່ານຜ່າໄດ້ສະພາບຄວາມຫຍຸ້ງຍາກທີ່ເກີດຂຶ້ນໃນຕໍ່ມາ ທ່ານ ທອງສິງ ທຳມະວົງ ໄດ້ແຈ້ງສະພາບການພາຍໃນຂອງລາວ ດ້ານການເມືອງ ແລະ ເສດຖະກິດ-ສັງຄົມ ໂດຍເນັ້ນວ່າ ລັດຖະບານລາວພວມເອົາໃຈໃສ່ຕໍ່ການພັດທະນາເສດຖະກິດ ເຊິ່ງເປັນໃຈກາງສູ້ຊົນແຕ່ນີ້ຮອດປີ 2015 ຍອດຜະລິດຕະພັນພາຍໃນໃຫ້ເພີ່ມຂຶ້ນ 8% ຂຶ້ນໄປ ແລະ ຮອດປີ 2020 ໃຫ້ນຳເອົາປະເທດຫຼຸດພົ້ນອອກຈາກສະພາວະດ້ອຍພັດທະນາ ບົນຈິດໃຈດັ່ງກ່າວ ລັດຖະບານພວມເລັ່ງລັດ ສ້າງຂະບວນການເຮັດທົດລອງ 3 ສ້າງ ໃນ 108 ບ້ານ ໃນ 51 ເມືອງທົ່ວປະເທດ ລາວເປັນປະເທດທີ່ບໍ່ມີເສັ້ນຊາຍແດນຕິດຈອດທະເລ ລາວຈຶ່ງພະຍາຍາມສ້າງເສັ້ນທາງຄົມມະນາຄົມ ໃຫ້ມີລັກສະນະຕິດຈອດ ແລະ ກາຍເປັນເສັ້ນທາງຜ່ານຂອງອະນຸພາກພື້ນ ດ້ວຍການກໍ່ສ້າງເສັ້ນທາງບົກໃໝ່ ແລວທາງເສດຖະກິດຕາເວັນອອກ-ຕາເວັນຕົກ ເໜືອ-ໃຕ້ ສ້າງເສັ້ນທາງລົດໄຟແຕ່ຈີນຫານະຄອນຫຼວງວຽງຈັນ ເພື່ອເຊື່ອມຕໍ່ກັບໄທ ແລະ ຈາກນະຄອນຫຼວງວຽງຈັນ ຫາຊາຍແດນຫວຽດນາມ.
ສອງຝ່າຍໄດ້ສະແດງຄວາມຊົມເຊີຍ ຕໍ່ຜົນສຳເລັດຂອງກອງປະຊຸມຄະນະກຳມາທິການຮ່ວມ ວ່າດ້ວຍການຮ່ວມມືສອງຝ່າຍ ລາວ-ກຳປູເຈຍ ກຳປູເຈຍ-ລາວ ຄັ້ງທີ 12 (JC-12) ທີ່ຊຽມຣຽບ ຣາຊະອານາຈັກກຳປູເຈຍ ໃນເດືອນມັງກອນ 2014 ທີ່ຜ່ານມາ ໂດຍໄດ້ເນັ້ນໃຫ້ສອງຝ່າຍສືບຕໍ່ຊຸກຍູ້ບັນດາຂະແໜງການຕ່າງໆເຫຼົ່ານັ້ນ ເພີ່ມທະວີ ແລະ ຜັນຂະຫຍາຍເນື້ອໃນຈິດຂອງກອງປະຊຸມດັ່ງກ່າວໃຫ້ເປັນຮູບປະທຳ ໂດຍສະເພາະ ການຮ່ວມມືດ້ານການເມືອງ ແລະ ຄວາມໝັ້ນຄົງ ການຮ່ວມມືດ້ານເສດຖະກິດ ການຄ້າ ຄົມມະນາຄົມ-ຂົນສົ່ງ ການທ່ອງທ່ຽວ ພະລັງງານ ການຮ່ວມມືດ້ານຂົງເຂດເສດຖະກິດອະນຸພາກພື້ນ ການຮ່ວມມືໃນຂອບສາມຫຼ່ຽມມໍລະກົດ ລາວ-ກຳປູເຈຍ-ໄທ ແລະ ການຮ່ວມມືດ້ານວັດທະນະທຳ-ສັງຄົມ ໄດ້ເນັ້ນເຖິງຄວາມສຳຄັນຂອງການຢ້ຽມຢາມຄັ້ງນີ້ ເຊິ່ງບໍ່ພຽງແຕ່ຈະເປັນຂີດໝາຍໃໝ່ແຫ່ງການເພີ່ມທະວີ ແລະ ຮັດແໜ້ນສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ຖານບ້ານໃກ້ເຮືອນຄຽງທີ່ດີຕໍ່ກັນເທົ່ານັ້ນ ຫາກຍັງເປັນການເພີ່ມທະວີຄວາມສາມັກຄີ ແລະ ຄວາມເຂົ້າອົກເຂົ້າໃຈໃນການພົວພັນຮ່ວມມື ເພື່ອການພັດທະນາໃນຄອບຄົວອາຊຽນອີກດ້ວຍ ນາຍົກລັດຖະມົນຕີທັງສອງປະເທດ ໄດ້ສະແດງຄວາມເພິ່ງພໍໃຈຕໍ່ສາຍພົວພັນມິດຕະພາບທີ່ມີມາແຕ່ດົນນານ ຖານບ້ານໃກ້ເຮືອນຄຽງທີ່ດີຕໍ່ກັນ ລະຫວ່າງສອງປະເທດ ແລະ ປະຊາຊົນສອງຊາດ ລາວ ແລະ ກຳປູເຈຍ ທີ່ນັບມື້ນັບແໜ້ນແຟ້ນ ນາຍົກລັດຖະມົນຕີທັງສອງ ໄດ້ຕີລາຄາສູງຕໍ່ໝາກຜົນຂອງການຮ່ວມມືຊ່ວຍເຫຼືອເຊິ່ງກັນ ແລະ ກັນໃນດ້ານຕ່າງໆ ອັນໄດ້ນຳເອົາຜົນປະໂຫຍດຕົວຈິງມາສູ່ປະຊາຊົນຂອງທັງສອງປະເທດ ພ້ອມກັນນັ້ນ ຍັງໄດ້ເນັ້ນເຖິງຄວາມຈຳເປັນ ໃນການເພີ່ມທະວີການຮ່ວມມືກັນ ລະດັບທະວີພາຄີ ກໍ່ຄືພະຫຸພາຄີ.
ຫຼັງຈາກການພົບປະສອງຝ່າຍຢ່າງເປັນທາງການແລ້ວ ສອງນາຍົກລັດຖະມົນຕີ ໄດ້ເປັນກຽດເຂົ້າຮ່ວມເປັນສັກຂີພິຍານ ໃນພິທີລົງນາມເອກະສານການຮ່ວມມືລະຫວ່າງສອງປະເທດ ຈຳນວນ 7 ສະບັບຄື: ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານສາທາລະນະສຸກ ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານກົດໝາຍ ແລະ ຍຸຕິທຳ ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານວັດທະນະທຳ ບົດບັນທຶກຄວາມເຂົ້າໃຈ ວ່າດ້ວຍການສ້າງຕັ້ງສະຖານກົງສູນໃຫຍ່ ລະຫວ່າງສອງປະເທດ ສັນຍາວ່າດ້ວຍການສຶກສາ ສັນຍາວ່າດ້ວຍການພົວພັນລະຫວ່າງນະຄອນຫຼວງວຽງຈັນ ແລະ ນະຄອນຫຼວງພະນົມເປັນ ບົດບັນທຶກວ່າດ້ວຍການພົວພັນຮ່ວມມືສອງຝ່າຍ ລະຫວ່າງກະຊວງປ້ອງກັນຄວາມສະຫງົບແຫ່ງ ສປປ ລາວ ແລະ ກະຊວງພາຍໃນແຫ່ງ ຣາຊະອານາຈັກກຳປູເຈຍ.
ໃນຕອນຄ່ຳຂອງວັນດຽວກັນ ພະນະທ່ານ ທອງສິງ ທຳມະວົງ ນາຍົກລັດຖະມົນຕີ ໄດ້ຈັດງານລ້ຽງອາຫານຄ່ຳ ເພື່ອເປັນກຽດແກ່ສົມເດັດ ຮຸນເຊັນ ພ້ອມດ້ວຍຄະນະ ແລະ ຕິດຕາມດ້ວຍການຊົມລາຍການສະແດງສິລະປະຂອງລາວຢ່າງຄຶກຄື້ນ.
ການຢ້ຽມຢາມ ສປປ ລາວ ຢ່າງເປັນທາງການຂອງສົມເດັດ ຮຸນເຊັນ ນາຍົກລັດຖະມົນຕີແຫ່ງ ຣາຊະອານາຈັກກຳປູເຈຍ ຄັ້ງນີ້ ຖືວ່າເປັນຂີດໝາຍໃໝ່ແຫ່ງການຮັດແໜ້ນສາຍພົວພັນ ແລະ ການເສີມຂະຫຍາຍການຮ່ວມມື ລະຫວ່າງປະຊາຊົນສອງຊາດ ລາວ ແລະ ກຳປູເຈຍ ໃຫ້ຈະເລີນງອກງາມຍິ່ງໆຂຶ້ນ.
ຂ່າວຈາກ: vientianemai.net