ການນຳຂັ້ນສູງເຮົາ ຕ້ອນຮັບນາຍົກລັດຖະມົນຕີ ຣາຊະອານາຈັກກຳປູເຈຍ
http://livelaos.blogspot.com/2014/02/blog-post_7501.html
ຕອນບ່າຍວັນທີ 6 ກຸມພາ 2014 ນີ້ ທີ່ທຳນຽບປະທານປະເທດ ພະນະທ່ານ ຈູມມາລີ ໄຊຍະສອນ ປະທານປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ສົມເດັດອັກຄະມະຫາເສນາບໍດີ ເຕໂຈ ຮຸນເຊັນ ນາຍົກລັດຖະມົນຕີ ແຫ່ງຣາຊະອານາຈັກກຳປູເຈຍ ພ້ອມຄະນະ ໃນໂອກາດທີ່ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງວັນທີ 6-7 ກຸມພານີ້.
ໂອກາດດັ່ງກ່າວນີ້ ທ່ານປະທານປະເທດ ໄດ້ສະແດງຄວາມຕ້ອນຮັບຢ່າງອົບອຸ່ນ ຕໍ່ການເດີນທາງມາຢ້ຽມຢາມ ສປປ ລາວ ຂອງຄະນະຜູ້ແທນຂັ້ນສູງ ແຫ່ງຣາຊະອານາຈັກກຳປູເຈຍ ຄັ້ງນີ້ ຖືເປັນຂີດໝາຍໃໝ່ແຫ່ງການຮັດແໜ້ນສາຍພົວພັນ ແລະ ການເສີມຂະຫຍາຍການຮ່ວມມື ລະຫວ່າງປະຊາຊົນສອງຊາດ ລາວ ແລະ ກຳປູເຈຍ ທີ່ມີມາແລ້ວນັ້ນ ໃຫ້ນັບມື້ຈະເລີນງອກງາມຍິ່ງຂຶ້ນ ພ້ອມນີ້ທ່ານປະທານປະເທດ ຍັງໄດ້ສະແດງຄວາມຊົມເຊີຍຕໍ່ຜົນສຳເລັດຂອງການພົບປະສອງຝ່າຍ ໃນນັ້ນກໍ່ແມ່ນ ການລົງນາມເຊັນເອກະສານການຮ່ວມມືສອງປະເທດ ທີ່ມີຫຼາຍຂົງເຂດຈຳນວນຫຼາຍສະບັບດ້ວຍກັນ ນີ້ມັນສະແດງໃຫ້ເຫັນຜົນສຳເລັດຂອງການຮ່ວມມືຂອງສອງປະເທດ ລາວ ແລະ ກຳປູເຈຍ ໃນໄລຍະຜ່ານມາ.
ການພົບປະສອງຝ່າຍ ໄດ້ດຳເນີນໄປໃນບັນຍາກາດແຫ່ງ ໄມຕີຈິດມິດຕະພາບທີ່ສະໜິດສະໜົມອົບອຸ່ນ ແລະ ເຂົ້າອົກເຂົ້າໃຈເລິກເຊິ່ງ ຊຶ່ງຕ່າງຝ່າຍກໍ່ໄດ້ສະແດງຄວາມເພິ່ງພໍໃຈ ແລະ ຊົມເຊີຍຕໍ່ສາຍພົວພັນຂອງສອງປະເທດ ທີ່ເປັນສາຍພົວພັນຖານບ້ານໃກ້ເຮືອນຄຽງທີ່ດີຕໍ່ກັນ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ ມາສູ່ປະຊາຊົນສອງຊາດທີ່ແທ້ຈິງ.
ຕອນທ້າຍທ່ານນາຍົກລັດຖະມົນຕີກຳປູເຈຍ ຍັງໄດ້ສະແດງຄວາມຂອບອົກຂອບໃຈມາຍັງທ່ານປະທານປະເທດ ທີ່ໄດ້ໃຫ້ກຽດຕ້ອນຮັບຄະນະຢ່າງອົບອຸ່ນ ພ້ອມທັງໄດ້ແຈ້ງໃຫ້ທ່ານປະທານປະເທດຊາບ ກ່ຽວກັບຜົນສຳເລັດຂອງການພົບສອງຝ່າຍ.
ເວລາຕໍ່ມາຂອງວັນດຽວກັນນີ້ ທີ່ສະພາແຫ່ງຊາດທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ຍັງໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ສົມເດັດອັກຄະມະຫາເສນາບໍດີ ເຕໂຈ ຮຸນເຊັນ ນາຍົກລັດຖະມົນຕີ ແຫ່ງຣາຊະອານາຈັກກຳປູເຈຍ ພ້ອມຄະນະເຊັ່ນດຽວກັນ.
ຕອນບ່າຍເວລາດຽວກັນນີ້ ຄະນະຜູ້ແທນຂັ້ນສູງຂອງກຳປູເຈຍ ກໍ່ໄດ້ໄປວາງພວງມາລາທີ່ອະນຸສາວະລີນັກຮົບນິລະນາມ.
ຂ່າວຈາກ: vientianemai.net
