ມູນຄ່າການລົງທຶນໃນ ຂພສ ຫຼາຍກວ່າ 8.000 ຕື້ກີບ
http://livelaos.blogspot.com/2014/02/8000.html
ການພັດທະນາເຂດເສດຖະກິດພິເສດ-ເຂດເສດຖະກິດສະເພາະ (ຂພສ) ຢູ່ ສປປ ລາວ ແມ່ນມີທ່າຂະຫຍາຍຕົວອັນພົ້ນເດັ່ນແມ່ນມີບໍລິສັດເຂົ້າມາລົງທຶນ ຊຶ່ງມີມູນຄ່າການລົງທຶນຕົວຈິງ 1.030.503.971 ໂດລາສະຫະລັດ ຫຼື ປະມານ 8.244 ຕື້ກີບ ໄປພ້ອມກັນນັ້ນ ຍັງສາມາດສ້າງວຽກເຮັດງານທຳໃຫ້ກັບປະຊາຊົນທ້ອງຖິ່ນ ໄດ້ຫຼາຍພັນຕຳແໜ່ງ.
ກອງປະຊຸມປຶກສາຫາລືທາງດ້ານວິຊາການ ກ່ຽວກັບການປະເມີນຜົນຂອງການພັດທະນາ ແລະ ຄຸ້ມຄອງ ຂພສ ຜ່ານຮ່າງດຳລັດວ່າງດ້ວຍ ຂພສ (ສະບັບປັບປຸງ) ແລະ ຮ່າງມະຕິຕົກລົງຂອງກົມການເມືອງສູນກາງພັກ ກ່ຽວກັບການພັດທະນາ ແລະ ຄຸ້ມຄອງ ຂພສ ທົ່ວປະເທດ ຈຸດປະສົງເພື່ອໃຫ້ຜູ້ເຂົ້າຮ່ວມ ພ້ອມກັນຄົ້ນຄວ້າປຶກສາຫາລືແລກປ່ຽນບົດຮຽນ ແລະ ປະກອບຄວາມຄິດເຫັນໃສ່ຮ່າງດຳລັດ ແລະ ຮ່າງມະຕິຕົກລົງ ໃຫ້ມີເນື້ອໃນລະອຽດຄົບຖ້ວນສົມບູນ ແລະ ລະອຽດຂຶ້ນຕື່ມ ເພື່ອໃຫ້ສອດຄ່ອງກັບການຈັດຕັ້ງປະຕິບັດຕົວຈິງ ກ່ອນຈະນຳລາຍງານຂໍທິດຊີ້ນຳຈາກຂັ້ນເທິງ.
ສຳລັບວຽກງານພັດທະນາ ແລະ ຄຸ້ມຄອງ ຂພສ ເຫັນໄດ້ວ່າ ສະພາບການພັດທະນາຢູ່ ສປປ ລາວ ມີບາດກ້າວຂະຫຍາຍຕົວ ແລະ ພົ້ນເດັ່ນ ມາຮອດປັດຈຸບັນ ມີບໍລິສັດເຂົ້າມາລົງທຶນແລ້ວຫຼາຍກວ່າ 100 ບໍລິສັດ ສາມາດສ້າງວຽກເຮັດງານທຳໄດ້ປະມານ 8.000 ຕຳແໜ່ງ ຈາກສະພາບການດັ່ງກ່າວ ເຫັນໄດ້ວ່າຜົນຂອງການຈັດຕັ້ງປະຕິບັດດຳລັດ 443/ນຍ ມີບາງມາດຕາຕ້ອງໄດ້ປັບປຸງ ເພື່ອເຮັດໃຫ້ເນື້ອໃນມີຄວາມສອດຄ່ອງລະອຽດ ແລະ ຮັດກຸມ ແລະ ສົມບູນຂຶ້ນຕື່ມ ເພີ່ມຄວາມສາມາດໃນການແຂ່ງຂັນກັບປະເທດອ້ອມຂ້າງ ຮັບປະກັນຜົນປະໂຫຍດລວມຂອງຊາດ ທັງຮັບຮອງໃຫ້ການພັດທະນາ ຂພສ ທັນສະພາບການ ໄປຄຽງຄູ່ກັບການສ້າງຄວາມໝັ້ນໃຈໃຫ້ແກ່ນັກລົງທຶນ ໃຫ້ເຂົ້າມາລົງທຶນໃນ ສປປ ລາວ ຫຼາຍຂຶ້ນ.
ກອງປະຊຸມຈັດຂຶ້ນວັນທີ 10 ກຸມພາ 2014 ທີ່ຫໍປະຊຸມແຫ່ງຊາດ ໄດ້ຮັບການສະໜັບສະໜູນຈາກອົງການ GIZ ປະຈຳ ສປປ ລາວ ໂດຍການເປັນປະທານຂອງທ່ານນາງ ບົວທາ ຂັດທິຍະ ຮອງປະທານຫົວໜ້າກອງເລຂາຄະນະກຳມະການແຫ່ງຊາດ ເພື່ອຄຸ້ມຄອງເຂດເສດຖະກິດພິເສດ ແລະ ເຂດເສດຖະກິດສະເພາະ ຊຶ່ງມີບັນດາຫົວໜ້າກົມ ກອງເລຂາຜູ້ປະຈຳການ ແລະ ຕາງໜ້າຈາກ ຂພສ 10 ແຫ່ງ ໃນຂອບເຂດທົ່ວປະເທດ.
ຂ່າວຈາກ: vientianemai.net
