ລາວ-ອາເມລິກາ ຕີລາຄາຄືນການຮ່ວມມືສອງຝ່າຍ
http://livelaos.blogspot.com/2014/02/blog-post_934.html
ໃນວາລະກອງປະຊຸມ ຄະນະຜູ້ແທນສອງຝ່າຍໄດ້ສະຫລຸບຕີລາຄາຄືນການພົວພັນຮ່ວມມື ລະຫວ່າງ ສອງປະເທດໃນໄລຍະຜ່ານມາ ໂດຍສະເພາະ ນັບແຕ່ກອງປະຊຸມປຶກສາຫາລືຮອບດ້ານລາວ-ອາເມລິກາ ຄັ້ງທີ IV ທີ່ວໍຊິງຕັນ ດີຊີ ໃນປີ 2012, ສອງຝ່າຍໄດ້ລົງເລິກປຶກສາຫາລື ແລະ ແລກ ປ່ຽນຄຳຄິດຄຳເຫັນນຳກັນຢ່າງກວ້າງຂວາງກ່ຽວກັບບັນຫາຕ່າງໆ ທີ່ມີຄວາມສົນໃຈຮ່ວມກັນໃນຂອບການຮ່ວມມືສອງຝ່າຍ ແລະ ບັນຫາພາກພື້ນເຊັ່ນ: ການຮ່ວມມືຂອງ ສປປ ລາວ ກັບບັນດາປະເທດອາຊຽນ, ບົດບາດການປະກອບສ່ວນຂອງອາເມລິກາໃນອາຊຽນ ແລະ ອາຊີ-ປາຊີຟິກ; ນອກນັ້ນ, ໃນຂົງເຂດການຮ່ວມມືສອງ ຝ່າຍລາວ-ອາເມລິກາ ກໍໄດ້ປຶກສາຫາລືກັນໃນວຽກງານການຊອກຄົ້ນຫາສິ່ງເສດເຫລືອຂອງທະຫານອາເມລິກາ ທີ່ຫາຍ ສາບສູນໃນປາງສົງຄາມ, ບັນຫາຂຸດຄົ້ນລະເບີດຝັງດິນທີ່ບໍ່ທັນແຕກ, ການຮ່ວມມືດ້ານສາທາລະນະສຸກ, ສິ່ງແວດລ້ອມ, ການຊຸກຍູ້ສົ່ງເສີມການພົວພັນ ຮ່ວມມືດ້ານການຄ້າ, ການລົງທຶນ ລະຫວ່າງສອງປະເທດ ພາຍຫລັງ ສປປ ລາວ ເຂົ້າເປັນສະມາຊິກຂອງອົງການການຄ້າໂລກ ໃນຕົ້ນປີ 2013 ທີ່ຜ່ານມາ ແລະ ທິດທາງການຮ່ວມມືກັນໃນອະນາຄົດ.
ຜ່ານການປຶກສາຫາລື ສອງຝ່ານມີຄວາມເປັນເອກະພາບກັນວ່າ: ການພົວພັນຮ່ວມມືສອງປະເທດໃນປະຈຸບັນມີທ່ວງທ່າອັນດີ ແລະ ມີບາດກ້າວຂະ ຫຍາຍຕົວໃໝ່. ສະຫະລັດອາເມລິກາ ໄດ້ຢືນຢັນທີ່ຈະສືບຕໍ່ສະໜັບສະໜູນ ແລະ ໃຫ້ການຮ່ວມມືອັນດີກັບ ສປປ ລາວ ໃນອະນາຄົດ ແລະ ຈະປະ ກອບສ່ວນຢ່າງເໝາະສົມເຂົ້າໃນບັນດາໂຄງການຕ່າງໆທີ່ອາເມລິກາ ມີສ່ວນຮ່ວມກັບບັນດາປະເທດອາຊຽນ ກໍຄືບັນດາປະເທດໃນພາກພື້ນອາຊີ-ປາຊີຟິກ.
